A Blood am Baam
Wenni aus mein Fensder schau
wos wohl für a Wedder is
is der Himml grau in grau
dass der Herbst kummt, is etz gwiß.
Der Baam verliert so nooch und nooch
seine Blädder immer mehr
irchendwann, des is ka Frooch
isa naggerd und ganz leer.
Der Wind, der tut des Sei dazu
dass ka Bläddla sich mehr häld
gibd dann aa ka bissla Ruh
bis des letzte runder fälld.
Nooch und nooch flieng alla runder
koohl is allas ball
bloßna aans,sis wie a Wunder
hängt nuch auf jedn Fall.
Es waggld einsam hie und her
häldsi bloßna fest
bleibd hänga, is des nuch so schwer
oo denna derrn Äsd.
Der Wind ziecht aa oo denn klann Blodd
des gibt nuch noonich nooch
solangs a bissla Kraft nuch hodd
bleibds hänga, keine Frooch.
Doch irgendwann, do werds zu schwer,
des Bläddla, des gibbd auf
es flattert aweng hie und her
im Flieng schauts nuch mol nauf.
Do worri ghängt, denggds so bei sich
ganz obn, des wor fei doll
im Frühjohr dann, ganz sicherlich
hängd allas widder voll.
Do werrn naia Blädder kumma
so wie alla Johr
nochn Winder kummd der Summer
des is wunderbor.
Reinhold Hartmann